សម្តេចតេជោហ៊ុនសែនបានស្នើឲ្យទូតជប៉ុនជួយធ្វើការកែតម្រូវការចុះផ្សាយរបស់សារព័ត៌មាននៅកម្ពុជា
22-July-2016 | ដោយ មែន កំសត់
បាត់ដំបង៖ប្រមុខរាជរដ្ឋាភិបាលកម្ពុជាបានប្រគល់ភារៈកិច្ចទៅឲ្យ ឯកអគ្គរដ្ឋទូតប្រទេសជប៉ុនធ្វើការកែតម្រូវចំពោះការចុះផ្សាយរបស់កាសែត ក្នុងស្រុកមួយដែលបានសរសេរថា លោកនាយករដ្ឋមន្ត្រីអាបេរបស់ជប៉ុនបានស្តីបន្ទោសចំពោះសម្តេច ។ ពាក់ព័ន្ធបញ្ហានេះសម្តេចតេជោបានអះអាងថានៅលើលោកនេះគ្មានអ្នកណា ហានស្តីឲ្យហ៊ុនសែនទេសូម្បីប្រធានាធិបតីអាមេរិក បារ៉ាក់ អូបាម៉ា មកស្រុកខ្មែរក៏មិនបានមកស្តីឲ្យនាយករដ្ឋមន្ត្រីខ្មែរដែរ ។
សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចចក្រកម្ពុជាបានថ្លែងបែបនេះទៅកាន់ ឯកអគ្គរាជទូជប៉ុនក្នុងពិធីសម្ភោធដាក់ឲ្យប្រើប្រាស់នូវគម្រោង ប្រព័ន្ធទឹកស្អាតនៅក្នុងខេត្ត បាត់ដំបង និង កំពង់ចាម នាព្រឹកថ្ងៃទី ២១ ខែ កក្កដា ឆ្នាំ ២០១៦ នៅខេត្តបាត់ដំបង ។
សម្តេចតេជោ នាយករដ្ឋមន្ត្រីបានមានប្រសាសន៍ថា៖នៅក្នុងជំនួបពិភាក្សាទ្វេរភាគី នៅលើវាលស្មៅ នៅប្រទេសម៉ុងហ្គោលី រវាងសម្តេច និង លោកនាយករដ្ឋមន្ត្រី ហ្សិនហ្សូ អាបេ នៃប្រទេសជប៉ុន បានប្រព្រឹត្តទៅយ៉ាងល្អណាស់ដោយបានពិភាក្សាទៅលើកិច្ចការទាំងឡាយ ដែលយើងអាចយល់ពីគោលជំហរគ្នាទៅវិញទៅមករួចជាស្រេចទៅហើយ ។
នៅក្នុងជំនួបនោះកម្ពុជាក៏បានស្នើសុំឲ្យជប៉ុនជួយពង្រឹងនូវសម ត្តភាពកងកម្លាំងរក្សាសន្តិភាពរបស់កម្ពុជាបន្ថែមទៀតដោយសារថា បច្ចុប្បន្នកងកម្លាំងរក្សាសន្តិភាពរបស់ជប៉ុនក៏កំពុងមានវត្តមាននៅ ក្នុងប្រទេសស៊ូដង់ខាងត្បូង ដូចកងទ័ពកម្ពុជាដែរក្នុងក្របខណ្ឌអង្គការសសហប្រជាជាតិដូចគ្នា។
សម្តេចតេជោបានបន្តថាប៉ុន្តែវាជាការគួរឲ្យសោកស្តាយណាស់ នៅត្រង់ថាជំនួបរបស់សម្តេចជា មួយលោកនាយករដ្ឋមន្ត្រី អាបេ ហើយក្នុងឋានៈជាមិត្តភក្តិគ្នា បែរជាត្រូវបានសារព័ត៌មានមួយនៅកម្ពុជា ប្រហែលជាលោកទូត គូម៉ាម៉ារូ យូជិ ឯកអគ្គរាជទូតជប៉ុនប្រចាំនៅកម្ពុជា បានអានរួចហើយព្រោះសារព័ត៌មាននោះមានជាភាសាខ្មែរផង អង់គ្លេសផង ។សារព័ត៌មាននោះបានចុះផ្សាយថា អាបេបានស្តីបន្ទោស ឲ្យសម្តេច ហ៊ុន សែន ឯណាទៅវិញឆ្កុយ។
សម្តេចតេជោបានបន្តថា៖“សារព័ត៌មានហ្នឹងចេញជាខ្មែរផងជាអង់គ្លេស ផង…ថាអាបេស្តីបន្ទោសឲ្យហ៊ុនសែនទៅឯណាឆ្កុយទៅ! ងាប់ហើយនៅលើលោកនេះអត់មានអ្នកណាហ៊ានស្តីបន្ទោសឲ្យ ហ៊ុន សែន ទេ។ សូមទោសអារឿងស្តីបន្ទោសហ្នឹងអត់ទេ។ សូម្បីប្រធានាធិបតីអាមេរិក អូបាម៉ា មកស្រុកខ្មែរ ក៏មិនមែនមកស្តីឲ្យនាយករដ្ឋមន្ត្រីខ្មែរទេ”។
គួររំលឹកថា៖ កាលពីថ្ងៃទី១៩ខែកក្កដា កាសែតខេមបូឌាដេលីបានចុះផ្សាយអត្ថបទមួយដោយដាក់ចំណងជើងថា “អាបេ ប្រាប់លោក ហ៊ុន សែន ថាសាលក្រមសមុទ្រចិនស្ថាពរហើយ”។
សម្តេច តេជោ ហ៊ុន សែន បានមានប្រសាសន៍ថា៖ សុំទោសអារឿងថាស្តីឲ្យនឹងអត់ទេ សូម្បីតែប្រធានាធិបតីអាមេរិក បារ៉ាក់ អូបាម៉ា មកស្រុកខ្មែរក៏មិនមកស្តីឲ្យនាយករដ្ឋមន្ត្រីស្រុកខ្មែរនោះទេ ។ វាទៅជាផ្តាស់អញ្ចឹងទៅ ខ្ញុំមិនមាត់មិនក៏អ្វីទេសូមទុកឲ្យជប៉ុនឆ្លើយតប ពិតមែនហើយដូចជាមានលោក ផៃ ស៊ីផាន ឆ្លើយតបតែខ្ញុំមិនឆ្លើយតបទេ ខ្ញុំទុកឲ្យអាបេទុកឲ្យមន្ត្រីជប៉ុនឆ្លើយតបថាអត្ថបទហ្នឹងវា ត្រឹមត្រូវ ឬ មិនត្រឹមត្រូវ ? ។
សម្តេចបានមានប្រសាសន៍ទៀតថា៖ “ខ្ញុំចង់មើលដែលថាសិទ្ធិបញ្ចេញមតិត្រូវបានគោរព ប៉ុន្តែនិយាយខុសគួរត្រូវបានកែតម្រូវ អញ្ចឹងសូមឲ្យភាគីជប៉ុនកែតម្រូវចុះ ព្រោះខ្ញុំធុញទ្រាន់ណាស់ជាមួយ អាការដែលគេមួលបង្កាច់នេះ អញ្ចឹងសូមទុកឲ្យជប៉ុន អញ្ចឹងប្រគល់ភារកិច្ចនេះឲ្យឯកអគ្គរាជទូតជប៉ុនធ្វើការកែតម្រូវទៅ ហើយឯកឧត្តមអាចសួរទៅនាយករដ្ឋមន្ត្រីអាបេថាអាបេនិយាយអញ្ចឹងឬអត់ អាចសួរទៅអ្នកកត់ត្រាជប៉ុនទាំងឡាយ ក៏បានបើមិនហ៊ានសួរទៅអាបេ”។
កាសែតខេមបូឌាដេលី បានចុះផ្សាយថានាយករដ្ឋមន្ត្រីជប៉ុនហាក់រិះគន់ខ្លាំងៗចំពោះជំហរ របស់កម្ពុជាលើជម្លោះសមុទ្រចិនខាងត្បូងដោយលើកឡើងថាសេចក្ដីសម្រេច របស់តុលាការអន្តរជាតិលើការអះអាងសិទ្ធិកាន់កាប់ទឹកដីដោយប្រទេសចិន គួរតែត្រូវបានគោរព។
សម្តេចបានចាត់ទុកការចុះផ្សារ របស់សារព័ត៌មាននោះបានធ្វើឲ្យប៉ះពាល់ដល់នាយករដ្ឋមន្ត្រីជប៉ុន វាបានធ្វើឲ្យប៉ះពាល់ដល់មន្ត្រីជប៉ុនដែលបាននិយាយល្អជាមួយគ្នា ហើយក្នុងរយៈពេលតែ៦ថ្ងៃ បានមកសម្ភោធសមិទ្ធផលជាមួយគ្នាទៀត ហេតុអ្វីជប៉ុនត្រូវនិយាយបបែបនេះ ៕
ចំនួនអ្នកទស្សនា
- ថ្ងៃនេះ2201
- ម្សិលមិញ5181
- សប្តាហ៍នេះ24961
- ខែនេះ7391
- ឆ្នាំនេះ250631
- សរុប20693087